Basha: Nesër votojmë SPAK, ditë e zezë për Ramën dhe qeverinë e tij 

basha

Kryetari i opozitës Lulzim Basha njoftoi sot se nesër në Kuvend, PD do të votojë ligjin për strukturën e posaçme antikorrupsion, SPAK.

Basha paralajmëroi se “nesër ligji kalon me votat tona. Rama, Ilir Beqaj, Arben Ahmetaj dhe shpura e të korruptuarve nuk do të ketë nesër ditën më të mirë të jetës së tyre, pasi nëse votohet ligji nesër, ky do të jetë makthi i tyre.”

“Ligji i SPAK, – tha ai, –  i zgjidh duart atyre punonjëve me integritet që të vazhdojnë hetimet për ata zyrtarë që zhdukin paratë e subvencionev…Nesër ata do të kenë një lajm të mirë, sepse SPAK do të jetë një alet i fuqishëm për PD-në sot në opozitë dhe nesër në qeverisje, për ta nxjerrë vendin nga krizat.

Edhe javët e fundit, Tahiri dhe Rama bënë gjithçka që kësaj strukture të veçantë t’i vendosnin mbi kokë figura politike që sot zaptojnë zyrat e shtetit, siç janë të dërguarit e Ramës në Drejtorinë e Pastrimit të Parave apo atë të dokumentacionit të klasifikuar, por në fakt, pas këmbëguljes tonë të gjitha këto kanë rënë dhe ligji nesër është në parametrat e kërkuar.

Me ligjet e tjera, mazhoranca e ka përcaktuar sesi do të veprojë. Duke shkelur zotimin me PD, qëndrimi do të jetë njësoj si për Vetingun; ne do të ngulmojmë për prevalizimin e ligjit të rënë në konsensus në 22 korrik dhe jo ato paçavuret që duan të kthejnë zyrtarët e korruptuar.

Asgjë nuk mund të shërbejë si alibi për Edi Ramën apo të detyrojë PD-në të japë votën për Edi Ramën.

Ne Vetingun e kemi çuar në Kushtetutë dhe presim një vendim të drejtë.

I pyetur për deklaratën e ambasadorit të SHBA, që PD-ja të mos e ankimojë Vetingun, Basha: “Kjo deklaratë është lexuar gabim, shiheni, por gjithsesi nuk ka ambasador të më tregojë si të kryej detyrën time kushtetuese dhe si qytetar. Ambasadorët kanë punën e tyre, unë kam punën time me ndërgjegjë të plotë,” nënvizoi kreu i opozitës.

Fjala e plotë e kryetarit të PD Lulzim Basha:

Basha: Po jemi të qartë, të vendosur dhe për sa mund të jesh i gëzuar në Shqipërinë e sotme, momenti që kemi pritur dhe kemi kërkuar prej janarit të këtij viti, më në fund ka ardhur. Ligji për Strukturën e Posaçme Anti-korrupsion, përfshi Byronë Kombëtare të Hetimit, sipas standardeve të Komisionit të Venecias është gati për miratim në Kuvendin e Shqipërisë dhe nesër do të ketë votën e plotë të Partisë Demokratike.

Një ligj i cili pati pengesa dhe stërkëmbësha të të gjitha natyrave. Së pari u projektua si një vegël e Saimir Tahirit dhe Edi Ramës. Dy herë Venecia u detyrua të ndërhynte në mënyrë që të bënte atë për të cilën është planifikuar dhe votuar më 22 korrik, të luftojë korrupsionin qeveritar dhe krimin e organizuar.

Edhe javët e fundit Edi Rama dhe Saimir Tahiri bënë gjithçka që kësaj strukture të veçantë e cila do të ngrihet me ndihmë, trajnim dhe financim të partnerëve tanë strategjikë, t’i vendosnin mbi kokë figura politike të cilat sot zaptojnë zyrat e shtetit, siç janë të emëruarit e Edi Ramës në Drejtorinë e Pasurimit të Parave apo në Drejtorinë e Informacionit të Klasifikuar.

Falë qëndresës tonë, falë vendosmërisë tonë, falë qartësisë tonë, natyrisht edhe me ndihmën dhe mirëkuptimin e partnerëve strategjikë,  një nga një këto alibi kanë rënë dhe ligji nesër është plotësisht në përputhje me standardin që Partia Demokratike dhe unë personalisht kemi kërkuar prej ditës së parë.

Saimir Tahiri dhe klanet e drogës të cilët sot kanë marrë një goditje me sekuestrimin, sipas raportimeve të para që unë kam, deri në 20 ton kanabis; Edi Rama si padron i drejtpërdrejtë dhe garant i Saimir Tahirit në kanabizimin e Shqipërisë; Ilir Beqaj, Arben Ahmetaj, shpura e të korruptuarve në qeveri nesër nuk do të kenë ditën më të mirë të jetës së tyre.

Struktura që votohet nesër, nëse zbatohet ashtu siç votohet, do të jetë makthi i çdo qeveritari të korruptuar, i çdo qeveritari të lidhur me krimin, duke nisur me ministrin e Brendshëm, Kryeministrin dhe ministrat e tij.

Ligji për SPAK-un i zgjidh duart atyre punonjësve të ndershëm dhe me integritet dhe me kapacitete profesionale që të hetojnë zullumet e përditshme që shkatërrojnë mirëqenien e qytetarëve shqiptarë, që zhdukin subvencionet, sepse s’ka lekë për subvencione  kur përfundojnë në xhepat e miqve të Kryeministrit, që i detyrojnë të mos kultivojnë fushat e tyre apo të çojnë bagëtinë e tyre, apo të shkojnë për dasëm apo për mort sepse u del në rrugë kanabisi me mbrojtje qeveritare.

Qytetarët shqiptarë pra, të cilët janë viktima kryesore e korrupsionit në nivele të paprecedenta në këto 26 vite dhe e krimit të ngritur në pushtet, nesër do të kenë një lajm të mirë: Votimin e ligjit për Strukturën e Posaçme Anti-korrupsion.

Me kontributin e PD, me vizionin e PD, me mbështetjen e plotë të Partisë Demokratike e cila me jetësimin e kësaj strukture do të ketë një aleat të fuqishëm në luftën kundër korrupsionit, sot në opozitë dhe nesër në qeverisje. Parakusht për ta nxjerrë Shqipërinë nga kriza ekonomike, kriza psikologjike dhe varfëria ku e ka zhytur korrupsioni dhe krimi i lidhur me Edi Ramën.

Pyetje: Po me ligjet e tjera si do të veprojë Partia Demokratike?

Basha: Me ligjet e tjera maxhoranca ka përcaktuar tashmë se si do të veprojë Partia Demokratike, duke përjashtuar “de facto” PD dhe duke e shkelur zotimin për konsensus, njësoj siç bëri me ligjin për Vettingun. Ndaj qëndrimi do të jetë i njejtë si për ligjin me Vetingun. Ne do të kërkojmë dhe do të arrijmë me të gjitha format, duke përfshirë edhe format kushtetuese prevalimin e amendamenteve kushtetuese të votuara me konsensus dhe me mbështetje euro-amerikane me datë 22 korrik . Dhe jo paçavuret e mafies dhe korrupsionit dhe shërbyesve të tyre të cilët kanë arritur përmes këtyre ligjeve të rikthejnë duart e qeverisjes, duart e qeveritarëve të korruptuar në strukturat të cilat Kushtetuta i kërkon të pastra nga ndërhyrja e ekzekutivit. Dhe do të pastrohen nga ndërhyrja e ekzekutivit duke filluar me strukturat e vetting-ut.

Pyetje: Z.Basha pse jeni kaq entuziastë për SPAK-un kur vettingun e njerëzve që do të punojnë në SPAK, në Byronë Kombëtare të Hetimit, në Prokurorinë e Posaçme dhe në Gjykatën Speciale do ti bëjë një strukturë që ju e keni çuar në Kushtetuese me merakun tuaj se ato do të kontrollohen nga qeveria?

Basha: Ne kemi bërë të gjitha përpjekjet që ligji të mos lejojë ndërhyrjen e ekzekutivit  emërimin e figurave drejtuese dhe punonjësve të SPAK-ut, gjyqtarëve, prokurorëve dhe punonjësve të policisë. Sigurisht që ligji për Vettingun është një ligj anti-kushtetues dhe ne presim që Gjykata Kushtetuese dhe Komisioni i Venecias të çmontojnë ato pjesë anti-kushtetuese të ligjit të cilat Edi Rama i do si garanci për të siguruar veten e tij dhe ministrat e tij nga drejtësia e vërtetë që nuk mbron por lufton krimin dhe korrupsionin. Dhe kemi bindjen e plotë që herët a vonë kjo do të ndodhë. Ndërkohë që asgjë nuk mund të shërbejë si alibi për Edi Ramën.

Asgjë nuk mund të ndalë PD të japë votën e saj pa asnjë dilemë për një strukturë që kemi kërkuar të votohet që prej janarit të këtij viti. Prandaj SPAK-u, BKH-ja do të kenë votën tonë unanime nesër në Parlamentin shqiptar.

Pyetje: Por a mund të funksionojë SPAK-u me këtë veting, siç është aktualisht?

Basha: Ne vettingun e kemi çuar në Kushtetuese dhe ne presim një vendim të drejtë të Kushtetueses në përputhje me Kushtetutën e Shqipërisë që është e qartë, në përputhje me Komisionin e Venecias që është i qartë. Por kjo kurrsesi nuk mund të na bëjë pjesë të lojës së Edi Ramës për të shtyrë pafundësisht krijimin e strukturës që lufton korrupsionin. Sepse kjo është loja: që të mbarojë mandatin pa nisur hetimet e peshqëve të mëdhenj, e  Al Kaponeve në qeveri, e kumbarëve të drogës në qeveri dhe kumbarëve të korrupsionit. Këtë luks nuk do t’ia japim. Nesër ligji kalon me votat tona.

Pyetje: Z.Basha ju vettingun e çuat në Kushtetuese pavarësisht ftesës ose kërkesës së ambasadorit amerikan për të mos e çuar në Kushtetuese?

Basha: I lexoni gabim. Në qoftë se i citoni duhet ti citoni siç i thotë.

Pyetje: Mund t’ua citoj unë?

Basha: Nuk ka nevojë të mi citoni sepse nuk pres nga asnjë ambasador të më tregojë cila është detyra kushtetuese e PD, e opozitës apo e imja si qytetar. Ambasadorët kanë detyrën e tyre, unë kam detyrën time dhe e kam kryer me ndërgjegje të plotë.

 

Faleminderit!

Kryesore
Të ngjashme

One Response to Basha: Nesër votojmë SPAK, ditë e zezë për Ramën dhe qeverinë e tij

  1. loni

    Si mund te jesh kunder ankimimit ne gjykaten kushtetuese

     

Leave a Response

Këto janë titujt kryesorë të gazetave për ditën e sotme, e enjte ...
Ben Blushi mblodhi sonte në mbrëmje për herë të parë atë që ...
Në kuadër të reformës zgjedhore, Koalicioni i Vëzhguesve Vendorë ka depozituar në ...
Gjatë seancës së të enjtes të Kuvendit të Shqipërisë, pritet të miratohet ...
Pas Ben Blushit, edhe deputetja Mimoza Hafizi ka deklaruar dorëheqjen nga Partia ...
Rilindja është slogani i Edi Ramës që përdori në vitin 2013 kur ...
Kryeministri Edi Rama dhe kryetari i Kuvendit Ilir Meta zhvilluan pasditen e ...
Ligji i ri që lejon importin e mbetjeve, i miratuar me votat ...
Kryeministri Edi Rama dhe kryetari i Parlamentit Ilir Meta ndodhen në takim ...
Ministria e Jashtme e Greqisë ka reaguar sërish ndaj deklaratave të komisionarit ...
Sekretari i Përgjithshëm i Partisë Demokratike Arben Ristani ka komentuar akuzat e ...
Presidenti Bujar Nishani dhe Zonja e Parë Odeta Nishani në kuadrin e ...
Pas zbulimit të mbi 10 tonëve kanabis në fshatrat e Vlorës, policia ...
Një “luftë” e heshtur në pamje të parë mes policisë dhe prokurorisë, ...
Kryetari i opozitës Lulzim Basha njoftoi sot se nesër në Kuvend, PD ...
Ish-ministri i Brendshëm Flamur Noka është tallur me investimin më ri në ...
Ministri i Transportit Sokol Dervishaj ka pritur në një takim Ambasadorin e ...
Kryetari i Partisë Demokratike, Lulzim Basha vijoi turin e dëgjimit dhe bashkëbisedimin ...
HARTA E FAQES SHERBIME